ప్రేమ "ఒక్క" రోజేనా....???!!!

"ప్రేమ" కొన్నిసార్లు కొత్తగా

మరికొన్నిసార్లు తాజాగా
చాలాసార్లు సంతోషంగా
ఉన్నచోట ఉండనీయకుండా
ఊపిరి సలపనీయకుండా
ఉక్కిరి బిక్కిరి చేస్తుంది...

ప్రేమ చిగురించిన తొలినాళ్లలోనో
కొత్త దంపతుల సరాగాల్లోనో
ఇవన్నీ మామూలే...

అంటే...
ప్రేమించిన మొదట్లోనో..
పెళ్లయిన కొత్తల్లోనో
ప్రేమ ఉంటే సరిపోతుందా...
మరి జీవితమంతా ఏముండాలి...?

అసలు ప్రేమించడానికి తీరికెక్కడిది?
బరువులు, బాధ్యతలు,
కష్టాలు, కడగండ్లు,
అప్పులు, అగచాట్లు
ఇన్నింటితో వేగుతుంటే...
మళ్లీ ప్రేమంటారేంటి?

అవన్నీ ఉంటే.. ప్రేమించకూడదా ఏం?
ఎలా కుదురుతుంది?
ఎందుకు కుదరదు?

అలసిన మోముతో
భారంగా అడుగులేసుకుంటూ
ఇంటికి చేరిన అతనికి
చిరునవ్వుతో స్వాగతం చెబుతూ
ఆప్యాయంగా చుట్టుకోవటం "ప్రేమ" కాదా?
దీన్ని "ప్రేమ" అనకూడదా?

"ప్రేమ"గా చెంత చేరి
నుదుటపై చెమటను తుడుస్తూ
బాగా అలసిపోయారా అన్నట్టు
కళ్లతోనే పరామర్శిస్తున్న ఆమెను
ఇంటిపనితో నువ్వూ అలసిపోయావుగా?
అంటూ కళ్లతోనే బదులిస్తూ..
ఊరడించటం "ప్రేమ" కాదా?
దీన్ని "ప్రేమ" అనకూడదా?

ఈ మాత్రం "ప్రేమ"ను కురిపించేందుకు
తీరుబాటు కావాలా?
ప్రత్యేకమైన రోజులు కావాలా?
"ప్రేమ" అనేది ఏ ఒక్కరోజులోనో పుట్టి
మరొక్క రోజులోనో అంతమయితే చాలా..?
జీవితమంతా ఉండక్కరలేదా?

ఇగోలను పక్కకు నెట్టి
ఒకరినొకరు అర్థం చేసుకుని
సాగిపోవటమే నిజమైన "ప్రేమ"
కానీ.. ఈ రోజుల్లో ఎంతమందికి
అది సాధ్యమవుతోందో...
ఆ దేవుడికే ఎరుక..........!!!